
မြန်မာနိုင်ငံမှာ ပရော်ဖက်ရှင်နယ် ဘောလုံးပြိုင်ပွဲကို ၂၀ဝ၉ ခုနှစ်က စပြီး ကျင်းပခဲ့တာ ငါးနှစ် အထိ ရှိနေပါပြီ။ အပျော်တမ်းဝန်ကြီး ဋ္ဌာနအသင်းတွေ ကနေ ပရော်ဖက်ရှင်နယ် ကလပ် အသင်းတွေကို ပြောင်းရွှေ့ရောက်ရှိလာတဲ့ မြန်မာ ကစားသမားတွေ ဘဝဟာ နတ်ရေကန်ထဲ ကျသွား သလို ချက်ချင်းပြောင်းလဲ မှုတွေ ဖြစ်ခဲ့ပြီး မြန်မာနိုင်ငံ မှာလည်း ပရော်ဖက်ရှင်နယ် ဘောလုံးသမား ဆိုတဲ့ လူတန်းစား တစ်ရပ် နေ့ချင်း ညချင်း ထွက်ပေါ် လာပါတယ်။
မြန်မာ့ ပရော်ဖက်ရှင်နယ် ဘောလုံး သမားတွေဟာ ခြေစွမ်းအရ နိုင်ငံတကာ အဆင့်မှီတယ် ဆိုတာ သံသယဖြစ် စရာရှိပေမယ့် ဘဝနေထိုင်မှု ပုံစံနဲ့ စိတ်နေ စိတ်ထားတွေ ကတော့ နိုင်ငံတကာ ပရော်ဖက်ရှင်နယ် ဘောလုံးသမားတွေ အတိုင်း ဟန်ပန် အမူအရာ တစ်ခွဲသားနဲ့ လူငယ်တွေ အမြင်မှာ အားကျစရာ လူတန်းစား တစ်ရပ် ဖြစ်လို့ လာပါတယ်။
မြန်မာနေရှင်နယ်လိဂ်
မြန်မာနေရှင်နယ်လိဂ် ဘောလုံးပြိုင်ပွဲကို ၂၀ဝ၉ ခုနှစ် မေလ ၁၆ ရက်မှာ စတင်ခဲ့ပြီး အသင်း ၈ သင်းနဲ့ ပြိုင်ပွဲစခဲ့ပါတယ်။ မြန်မာ နေရှင်နယ်လိဂ်အသင်းတွေကို မြန်မာနိုင်ငံရဲ့ လုပ်ငန်းရှင် သူဋ္ဌေးကြီးတွေက တာဝန်ယူတည်ထောင်ခဲ့ပြီး ပြည်နယ်နဲ့ တိုင်းဒေသတွေကို အခြေပြု ဖွဲ့စည်းခဲ့ပါတယ်။
ပထမဆုံးပြိုင်ပွဲဝင်ခဲ့တဲ့ အသင်းရှစ်သင်းကတော့ ရန်ကုန်တိုင်းဒေသကြီး ကိုယ်စားပြု ရန်ကုန်ယူနိုက်တက်၊ မန္တလေးတိုင်းဒေသကြီးကိုယ်စားပြု ရတနာပုံ၊ ဧရာဝတီတိုင်းဒေသကြီး ကိုယ်စားလှယ် ဒယ်လ်တာယူနိုက်တက်၊ ရှမ်းပြည်နယ်ကိုယ်စားပြု ကမ္ဘောဇ၊ မကွေးတိုင်းဒေသကြီး ကိုယ်စားပြု မကွေး၊ ပဲခူးတိုင်းဒေသကြီး ကိုယ်စားပြု ဥဿာ၊ တနင်္သာရီ နဲ့ မွန်ပြည်နယ် ကိုယ်စားပြု ဆောက်သမ်းမြန်မာ၊ စစ်ကိုင်းတိုင်းဒေသကြီး ကိုယ်စားပြု ဇေယျာရွှေမြေအသင်းတွေပါ။
ကလပ်အသင်းတွေ စတင်ဖွဲ့စည်းခဲ့ပြီး ကစားသမားတွေကို ပရော်ဖက်ရှင်နယ် စာချုပ် ချုပ်ဆိုမှုတွေ လုပ်ခဲ့ကြပြီး မြန်မာ့ဘောလုံး လောကကို တစ်ခေတ်ဆန်းစေ ခဲ့ပါတယ်။
ဝန်ကြီးဋ္ဌာနအသင်းတွေမှာ လစာ လေးသောင်း၊ ငါးသောင်းလောက်နဲ့ ဘောလုံး ကစားနေကြရတဲ့ မြန်မာဘောလုံး သမားတွေရဲ့ လစာဟာ ပရော်ဖက်ရှင်နယ် ခေတ်ဦးမှာ အမြင့်ဆုံး ဆယ်သိန်း ကနေ အနိမ့်ဆုံး သုံးသိန်း အထိ ရလာပါတယ်။
နိုင်ငံခြားသားကစားသမားတွေလည်း မြန်မာနေရှင်နယ်လိဂ်ကို စတင် ဝင်ရောက်လာပြီး သူတို့တွေရဲ့ လစာငွေဟာလည်း အမေရိကန် ဒေါ်လာ ငါးထောင်ကနေ သုံးထောင်ကြား ရှိပါတယ်။ မြန်မာ့လက်ရွေးစင် ကစားသမား တစ်ဦးရဲ့လစာငွေဟာ မြန်မာနိုင်ငံမှာ ကုမ္ပဏီ တစ်ခုက မန်နေဂျင်း ဒါရိုက်တာ တစ်ဦးရဲ့ လစာငွေနဲ့ ညီမျှနေ တာကြောင့် လူငယ်တွေရဲ့ အသက်မွေး ဝမ်းကျောင်း လုပ်ငန်း ရည်မှန်းချက်ထဲမှာ ဘောလုံး ကစားဖို့ဆိုတဲ့ ရည်မှန်းချက် တစ်ခု ဝင်ရောက် လာပါတယ်။

ဘောလုံးသမားဖြစ်ချင်တယ်
မြန်မာနေရှင်နယ်လိဂ် ပြိုင်ပွဲစတင်ပြီး နှစ်နှစ် အတွင်းမှာ မြန်မာကစား သမားတွေရဲ့ လစာဟာ ဆယ်သိန်း ကနေ သိန်းသုံးဆယ်ကျော် အထိဖြစ်လာပြီး မြန်မာ မိဘတွေ အကြားမှာလည်း သားသမီးကို ဘောလုံး ကစားဖို့ တိုက်တွန်း လာတဲ့ အထိ ပရော်ဖက်ရှင်နယ် ဘောလုံးသမား အိပ်မက်ဟာ မြန်မာပြည်သူတွေ အကြားမှာ ကျယ်ပြန့် လာပါတယ်။
“အရင်က ကျွန်တော် ဘောလုံး သွားကန်ရင် ပညာရေး ထိခိုက်မှာ စိုးလို့ တားမြစ်ခဲ့တဲ့ မိဘတွေက နောက်ပိုင်းမှာ အကယ်ဒမီတွေ အတွက် လူရွေးပွဲတွေလု ပ်ရင် ကိုယ်တိုင် လိုက်ပို့ အားပေး တာမျိုးတွေ လုပ်လာတယ်။ အခုဆို ကျွန်တော် ဘောလုံး ကစားတာကို မကန့်ကွက်တဲ့ အပြင် ပံ့ပိုး ကူညီမှုတွေ လုပ်လာပါတယ်။” လို့ နေပြည်တော် အက်ဖ်စီ ဘောလုံး အကယ်ဒမီမှာ ဘောလုံး ပညာ သင်ကြားနေတဲ့ အသက် ၁၅ နှစ် အရွယ် သန်းစိုးက ပြောပါတယ်။
မြန်မာနိုင်ငံမှာ ပရော်ဖက်ရှင်နယ် ဘောလုံးလိဂ် ပေါ်ထွန်း လာပြီးနောက်ပိုင်း လူငယ်တွေ ဘောလုံး ကစားဖို့ ပိုမို အားသန် လာသလို ကလပ်အသင်း အချို့ကလည်း ဘောလုံး အကယ်ဒမီတွေ ဖွင့်လှစ် ပို့ချပြီး လူငယ်ကစားသမား ရှာဖွေမှုတွေ လုပ်လာပါတယ်။
“ပရိုလိဂ်နောက်ပိုင်း လူငယ်တွေဘောလုံးကို ပိုစိတ်ဝင် စားလာတာ တွေ့ရပါတယ်။ ဘောလုံး သင်တန်းတွေ အကယ်ဒမီတွေ အတွက် လူရွေးပွဲ လုပ်ရင် လူပေါင်း ရာချီပြီး လာအရွေးခံကြပါတယ်။
ဒါပေမဲ့ ရေရှည်မှာ အောင်မြင်တဲ့ ဘောလုံးသမားဖြစ်ဖို့က ကစားသမား ကိုယ်တိုင် ကြိုးစားရမှာပါ” လို့ ရန်ကုန် ယူနိုက်တက် အသင်း လူငယ် ဖွံ့ဖြိုးရေး နည်းစနစ် ဒါရိုက်တာ ဦးဝင်းသူမိုးက မြန်မာ လူငယ်တွေ ဘောလုံး အပေါ် စိတ်ဝင်စားမှု မြင့်တက် လာတာကို ပြောပါတယ်။
လက်ရှိ မြန်မာနိုင်ငံမှာ ကမ္ဘာ့ဘောလုံး အဖွဲ့ချုပ်(FIFA) အသိအမှတ်ပြု ဘောလုံး အကယ်ဒမီ နှစ်ခုရှိပြီး မန္တလေးမြို့နဲ့ ဧရာဝတီတိုင်း ပုသိမ်မြို့တွေမှာ ဖွင့်လှစ် ထားပြီး ရန်ကုန်ယူနိုက်တက်၊ ရတနာပုံ အက်ဖ်စီ၊ နေပြည်တော်အက်ဖ်စီ ဘောလုံးအသင်းတွေ ကလည်း အကယ်ဒမီ ဖွင့်လှစ် သင်ကြားမှုတွေ ပြုလုပ်ပေး နေပါတယ်။
ဒီဘောလုံး အကယ်ဒမီတွေ အားလုံးဟာ အခမဲ့ ဘောလုံးပညာ သင်ကြားပေး သလို ပညာရေး အတွက် ပံ့ပိုးကူညီမှု တွေလည်း ပြုလုပ်ပေး ပါတယ်။ မြန်မာနိုင်ငံမှာ အခပေး ဘောလုံး သင်တန်းကျောင်း နှစ်ကျောင်းလည်း ရှိပြီး မန္တလေးမြို့မှာ Super Star ဘောလုံး အကယ်ဒမီနဲ့ ရန်ကုန်မြို့မှ ရန်ကုန် ယူနိုက်တက်ဘောလုံး သင်တန်းကျောင်းတွေ ဖြစ်ပါတယ်။
ရန်ကုန်ယူနိုက်တက် လူငယ်ဘောလုံး သင်တန်းကျောင်း ကတော့ လစဉ်ကြေး တစ်လ သုံးသောင်းကျပ်နှုန်းနဲ့ သင်ကြားပေးနေပြီး Level 1, 2 ဆိုပြီး
အဆင့် အလိုက် သင်ကြားပေး နေတာပါ။ ဘောလုံးသင်တန်း ကျောင်းတွေ ကလည်း ဘောလုံးသမား ဖြစ်ဖို့ ရည်မှန်းထားတဲ့ လူငယ်တွေ အတွက် ကြားခံပေါင်းကူး တံတားတစ်ခုပါ။
ဂုဏ်ယူစရာ လက်ရွေးစင် ဘောလုံးသမားဘဝ
မြန်မာနိုင်ငံမှာ မိဘတွေဟာ သားသမီး တွေကို ဆရာဝန်၊ အင်ဂျင်နီယာ စတဲ့ အသက်မွေး ဝမ်းကျောင်း ပညာရပ်တွေကို အဓိကထား သင်ကြားစေပြီး ဂုဏ်ယူ တတ်ကြပါတယ်။ ၂၀၁၄ အာရှယူ-၁၉ ချန်ပီယံရှစ် ပြိုင်ပွဲပြီးတဲ့ နောက်မှာတော့ လက်ရွေးစင် ဘောလုံး သမားဘဝဟာ ဂုဏ်ယူစရာ ကောင်းတယ် ဆိုတာကို လူငယ်တွေနဲ့ မိဘတွေ ပိုမို သိရှိ နားလည် လာပါတယ်။
မြန်မာယူ-၁၉ လူငယ်ဘောလုံး အသင်းဟာ မြန်မာနိုင်ငံမှာ ကျင်းပ ပြုလုပ်ခဲ့တဲ့ အာရှယူ-၁၉ ချန်ပီယံရှစ်ပြိုင်ပွဲမှာ ဆီမီးဖိုင်နယ် အဆင့် အထိ တက်ရောက်နိုင် ခဲ့ပြီး မြန်မာ့ဘောလုံး သမိုင်းမှာ ပထမဆုံး အကြိမ် ကမ္ဘာ့ဖလား ဘောလုံးပြိုင်ပွဲ ဝင်ပြိုင်ခွင့် ရခဲ့တဲ့ အတွက် တစ်နိုင်ငံလုံး ဂုဏ်ယူ ခဲ့ကြပြီး အသက် ၁၉ နှစ် အရွယ်လူငယ်လေးတွေ ဟာလည်း သူရဲကောင်း ဖြစ်ခဲ့ပါတယ်။
“ကျွန်တော်တို့ ငယ်ငယ်က ဘောလုံးကို အရူးအမူး စွဲလမ်းပြီး ပညာရေး ဘက်မှာ အားနည်း ချက်တွေ ရှိခဲ့တယ်။ အိမ်က မိဘတွေ ကတော့ ဆရာဝန်ကြီးတွေ၊ အင်ဂျင်နီယာ ကြီးတွေ ဖြစ်စေချင် ခဲ့တာပေါ့။ ဒါပေမဲ့ လက်ရွေးစင်ဖြစ်ပြီး နောက်ပိုင်းမှာ လက်ရွေးစင် ဘောလုံးသမား ဘဝကိုပိုပြီး မြတ်နိုး လာတယ်။ နိုင်ငံတစ်နိုင်ငံမှာ ဆရာဝန်တွေ၊ အင်ဂျင်နီယာတွေ သိန်းနဲ့ ချီပြီးရှိပေမယ့် လက်ရွေးစင် ဘောလုံး သမားက ၁၁ ယောက်ပဲ ရှိတယ်လေ” ဒီစကားတွေကိုတော့ မြန်မာ့ လက်ရွေးစင် ကစားသမားဟောင်း ကိုမျိုးလှိုင်ဝင်းက ပြောခဲ့တာပါ။
ဒီနေ့ခေတ် လက်ရွေးစင် ဘောလုံးသမားတွေ ဘဝဟာ မိမိ ဝါသနာပါတဲ့ အလုပ်ကို လုပ်ကိုင်ရင်း ပြည့်စုံတဲ့ ဘဝအခြေ အနေတွေကို ပိုင်ဆိုင်မှု ရထားပေမယ့် ရှုံးနိမ့်မှုတွေ ကြုံတွေ့ လာချိန်မှာ ဝေဖန်ခံ ရသလို လူမှုဘဝ နေထိုင်မှု မှာလည်း ကစားသမား အချို့ အမှား အယွင်းတွေ လုပ်လာတဲ့ အတွက် ပြစ်တင် မှုတွေနဲ့လည်း ရင်ဆိုင်နေ ရပါတယ်။
မြန်မာနေရှင်နယ်လိဂ် ခေတ်ဦးမှာ ဘောလုံးသမားတွေ ညကလပ်တွေမှာ ရန်ဖြစ်တာ သောက်စား မူးယစ်ပျော်ပါးနေတဲ့ သတင်းတွေ ထွက်ပေါ်ခဲ့ပြီး နောက်ပိုင်း မှာလည်း ကစားသမား အချို့ရဲ့အိမ်ထောင်ရေး ဖောက်ပြန်မှု သတင်းတွေဟာ ကျယ်ကျယ် လောင်လောင် ဖြစ်လာပါတယ်။
၂၀၁၃ ဆီးဂိမ်းမှာ မြန်မာယူ-၂၃ ဘောလုံးအသင်း အုပ်စုအဆင့် ကနေ အရှက် တကွဲ လှည့်ပြန် ခဲ့ရတဲ့ နောက်ဆက်တွဲ အကျိုးဆက် အနေနဲ့ မြန်မာနေရှင်နယ်လိဂ်မှာ လစာတွေ ကန့်သတ် ထိန်းချုပ် ခံလာရပါတယ်။
ကစားသမား လစာဟာ အမြင့်ဆုံး ဆယ်သိန်းသာ ခံစားခွင့် ရှိတော့ပြီး လူငယ်ကစား သမားတွေရဲ့ လစာလည်း လျော့ကျ လာပါတယ်။
“ဘောလုံးသမားတွေဆိုတာ လူငယ်တွေ အတွက် စံပြပုဂ္ဂိုလ်ပါ။ လူငယ်တွေ အတုယူ မမှားစေဖို့ အတွက် အနေအထိုင် ဆင်ခြင်သင့်တယ်။ နိုင်ငံတကာမှာလည်း ကစားသမားတွေ ဖောက်ပြန် မှုတွေ ရှိတတ်ပေမယ့် အဲ့လို ကစားသမားတွေဟ ကျဆုံး သွားတာချည်းပါပဲ” လို့ ကစားသမားတွေ စည်းကမ်းတကျ ရှိဖို့ကို မြန်မာနိုင်ငံဘောလုံးအဖွဲ့ချုပ် ဒု-ဥက္ကဋ္ဌ ဦးတင်အောင်က ပြောပါတယ်။

မဇ္ဈိမ မာလ်တီမီဒီယာ by mzmm_admin
Original link - http://mizzimaburmese.com/article/7950
ဒီပို့စ်လေးကို သဘောကျရင် | လုပ်ပေးခဲ့နော်။ |

No comments:
Post a Comment