ခရီးများနေသည့်အတွက် ကစားသမားများ ကြံ့ခိုင်မှုကို ဂရုစိုက် ပြင်ဆင်ရမည်ဟု ရီနီဆို

ဇွဲကပင်နှင့် ရတနာပုံပွဲ၌ အသင်းအား ညွှန်ကြားနေသည့် နည်းပြ ရီနီ (ဓာတ်ပုံ - ရွှေဘုတ်)
ဖေဖော်ဝါရီ ၂၂ ၊ ရန်ကုန်

မြန်မာ နေရှင်နယ်လိဂ် ကလပ် ရတနာပုံ အသင်း အနေဖြင့် ဖေဖော်ဝါရီလ အတွင်း ခရီးစဉ်များ တောက်လျှောက် ဆက်နေသည့် အတွက် ကစားသမားများ ကြံ့ခိုင်မှုကို ဂရုစိုက် ပြင်ဆင် ရမည် ဟု နည်းပြချုပ် ရီနီ က ဆိုသည်။

ရတနာပုံ အသင်းသည် ဖေဖော်ဝါရီလ အတွင်းတွင် မြန်မာ နေရှင်နယ်လိဂ် ပွဲစဉ်များ အဖြစ် ဆောက်သမ်းမြန်မာ (အဝေးကွင်း)၊ ဇေယျာရွှေမြေ (အိမ်ကွင်း)၊ ဇွဲကပင် ယူနိုက်တက် (အဝေးကွင်း) တို့နှင့် ကစား ခဲ့ပြီး လာမည့် အပတ်တွင် ရှမ်းယူနိုက်တက် (အဝေးကွင်း) နှင့် ကစားရမည် ဖြစ်သည်။

“ အသင်းက ပြီးခဲ့တဲ့ အပတ်မှာ ဗထူး၊ အခု ရန်ကုန်၊ လာမယ့် တစ်ပတ်မှာ တောင်ကြီးကွင်းကို သွားကစား ရမှာပါ။ ကြားထဲမှာ ကစားသမားတွေ အနေနဲ့ ခရီးပန်း တာတွေ မဖြစ်အောင် သွားလာမှု ကိုလည်း ကောင်းမွန်အောင် စီစဉ် ထားပါတယ်။

ဒါ့အပြင် အသင်းရဲ့ ကြံ့ခိုင်မှု မကျအောင်လည်း နည်းပြ အဖွဲ့တွေ အားလုံး တိုင်ပင်ပြီး အဓိကထား ပြင်ဆင် ထားပါတယ်။

ပွဲမှာတော့ ကြံ့ခိုင်မှုအရ ပိုကောင်းတဲ့ သူကိုပဲ ပွဲထွက် ကစားသမား အဖြစ် သုံးသွားမှာပါ။ ရလဒ်ကောင်းတွေ ရဖို့လည်း ကြိုးစား ပြင်ဆင် ထားပါတယ် ” ဟု ရတနာပုံ နည်းပြချုပ် ရီနီက အသင်းနှင့် ပတ်သက်၍ ပြောသည်။

ရတနာပုံ အသင်းသည် ၂၀၁၆ ဘောလုံး ရာသီတွင် ရလဒ်ကောင်း များရရှိနေပြီး လက်ရှိ မြန်မာ နေရှင်နယ်လိဂ် ပွဲစဉ် (၇) ပွဲကစားပြီးချိန်တွင် ရှုံးပွဲ မရှိသေးပဲ ငါးပွဲနိုင် နှစ်ပွဲ သရေ ရလဒ်ဖြင့် ရမှတ် ၁၇ မှတ် ရရှိကာ အမှတ်ပေး ဇယား ထိပ်ဆုံးတွင် ဦးဆောင်လျက် ရှိသည်။

မဇ္ဈိမသတင်း by mizzima

Originally published at - http://mizzimaburmese.com/article/11503