ဒု-အကျော့တွက် နိုင်ငံခြား ကစားသမားများ ကြိုတင်ခေါ်ယူ လေ့ကျင့်ရန် ဆောက်သမ်းအသင်း စီစဉ်

၂၀၁၆ ဘောလုံးရာသီ မြန်မာ နေရှင်နယ်လိဂ်၌ ဆောက်သမ်းအသင်း ယှဉ်ပြိုင် ကစားနေစဉ် (ဓာတ်ပုံ-ရွှေဘုတ်)
ဖေဖော်ဝါရီ ၁၊ ရန်ကုန်

၂၀၁၆ ဘောလုံး ရာသီတွင် လိဂ်-၁ သို့ တန်းပြန် တက်လာနိုင် ခဲ့သော ဆောက်သမ်း မြန်မာ အသင်းသည် ဒုတိယ အကျော့ ဘောလုံး ရာသီ အတွက် နိုင်ငံခြားသား ကစားသမားများ ကြိုတင် ခေါ်ယူ လေ့ကျင့် မှုများ ပြုလုပ်ရန် စီစဉ် ထားသည် ဟု ဆောက်သမ်း အသင်း မန်နေဂျာ ဦးမြင့်ကြူးက ပြောသည်။

ဆောက်သမ်းမြန်မာအသင်းသည် လက်ရှိတွင် နိုင်ငံခြားသားကစားသမားများ တစ်ဦးမှ ခေါ်ယူထားခြင်း မရှိသေးသော်လည်း ဒု-အကျော့ရာသီအတွက်မူ နိုင်ငံခြားသား သုံးဦးထိ ခေါ်ယူရန် စီစဉ်လျက်ရှိသည်။

“ ဒု-အကျော့အတွက် နိုင်ငံခြားသားကစားသမားခေါ်ဖို့ရှိပါတယ်။ ရှေ့၊ လယ်၊ နောက် သုံးယောက်ထိ ခေါ်သွားမှာပါ။ ဒု-အကျော့ကျမှဆိုတော့ အသင်းမှာ အထိုင်မကျမှာ စိုးတဲ့အတွက် ကြိုပြီးခေါ်ဖို့ လုပ်နေပါတယ်။

စာချုပ်တာမျိုးမဟုတ်သေးပဲ အသင်းမှာလာပြီး လေ့ကျင့်ခန်းပူးပေါင်းလုပ်ဆောင်တဲ့ သဘောမျိုးလိုချင်တာပါ။

ဒါမှ ဒု-အကျော့ပြန်စတဲ့အချိန်မှာ အသင်းအတွက် တခါတည်းအထိုင်ကျအောင်လို့ပါ။ တောင်အာဖရိကဘက်က ကစားသမားတွေ ခေါ်ဖို့ အေးဂျင့်က တစ်ဆင့်ချိတ်ထားပါတယ်။

ဘရာဇီးတို့ နိုက်ဂျီးရီးယားတို့ ပါနိုင်ပါတယ်။ အသင်းက လက်ရှိခြေစွမ်းအရရောပြိုင်ဘက်အသင်းတွေရဲ့ ပြင်ဆင်မှုတွေအရရော အသင်းအနေနဲ့ နိုင်ငံခြားသားကစားသမားက ခေါ်ဖို့ လိုနေပါပြီ ” ဟု ဦးမြင့်ကြူးက ဆိုသည်။

ဆောက်သမ်းအသင်းမှာ ၂၀၁၂ဘောလုံးရာသီမှစကာ ပြည်ပကစားသမားခေါ်ယူခြင်းမရှိတော့ပဲ ပြည်တွင်းကစားသမားများဖြင့် ပြိုင်ပွဲဝင်ခဲ့ပြီး ၂၀၁၄ဘောလုံးရာသီဒု-အကျော့ တွင်မူ နိုင်ငံခြားသား ကစားသမား လေးဦးခေါ်ယူခဲ့သော်လည်း တန်းဆင်းခဲ့ရသည်။

ထို့နောက် မြန်မာနေရှင်နယ်လိဂ်-၂တွင် ပြည်တွင်းကစားသမားများဖြင့်သာ ယှဉ်ပြိုင်ခဲ့ပြီး ချန်ပီယံဖြစ်ကာ တစ်နှစ်အတွင်း တန်းပြန် တက်နိုင်ခဲ့သည်။

မဇ္ဈိမသတင်း by mizzima

Originally published at - http://mizzimaburmese.com/article/10619