ကွင်းလယ် ကစားသမား ရှိုင်းသူရကို ရတနာပုံ သုံးနှစ် စာချုပ် သက်တမ်းတိုး

ယခုနှစ် ဘောလုံး ရာသီတွင် ရတနာပုံ အသင်း၌ ခြေစွမ်းပြ ကစားနေသည့် ရှိုင်းသူရ (ဓာတ်ပုံ-ရွှေဘုတ်)
ဖေဖော်ဝါရီ ၉ ၊ ရန်ကုန်

မြန်မာ နေရှင်နယ်လိဂ် ကလပ် ရတနာပုံ အသင်းသည် အသင်း၏ အဓိက ကွင်းလယ် ကစားသမား ရှိုင်းသူရနှင့် သုံးနှစ် သက်တမ်းတိုး စာချုပ် ချုပ်ဆို လိုက်သည်။

ရှိုင်းသူရသည် ရတနာပုံအသင်း လူငယ်အသင်းမှ ပေါ်ထွက်လာသည့် ကစားသမား တစ်ဦးဖြစ်ပြီး သက်တမ်း အလိုက် လက်ရွေးစင် အသင်းများတွင် ရွေးချယ်ခံ ခဲ့ရကာ လက်ရွေးစင် ကစားသမား အဖြစ် ကမ္ဘာ့ဖလားခြေစစ်ပွဲ ၂ပွဲ အတွက် အရွေးခံ ခဲ့ရဖူးသည်။

“ဆီးဂိမ်းက ပြန်လာ ကတည်းက သက်တမ်းတိုး စာချုပ် ချုပ်ဖြစ်တာပါ။ လက်မှတ်ထိုးကြေး သိန်း ၂၅၀ ကို သိန်း ၁၀၀ အရင်ပေး ပါတယ်။

ဒီနှစ်ကုန်ရင် ကျန်တာ ပေးမယ် ဆိုပြီး ကြားထဲမှာ မန်နေဂျာ အပြောင်း အလဲကြောင့် ကြန့်ကြာ သွားတာပါ။ ကျွန်တော့်ဘက် ကလည်း မိသားစုက တောင်းနေလို့ အခုလို အွန်လိုင်းမှာ တင်လိုက် ရတာပါ။ အခုတော့ အသင်းနဲ့ အားလုံး ပြန်အဆင်ပြေ သွားပါပြီ။

စာချုပ်သက်တမ်းက သုံးနှစ် ဆိုတော့ ၂၀၁၉ အထိ အသင်းမှာ ရှိမှာပါ။ အသင်း အတွက်လည်း အကောင်းဆုံး ကြိုးစား သွားပါ့မယ် ” ဟု ရှိုင်းသူရက ပြောသည်။

ရတနာပုံ ကွင်းလယ် ကစားသမား ရှိုင်းသူရသည် ၂၀၁၆ ဘောလုံး ရာသီ၌ အသင်းတွင် ပုံမှန် ပွဲထွက်ခွင့် ရလျက်ရှိပြီး ဖန်တီးမှုများ၊ ဂိုးများသွင်းယူ ပေးကာ ခြေစွမ်းပြနေသည့် ကစားသမား တစ်ဦး ဖြစ်သည်။

ရတနာပုံ အသင်းသည် လက်ရွေးစင် ကစားသမား အများအပြား မွေးထုတ် ပေးနိုင်ခဲ့ပြီး လက်ရှိ လက်ရွေးစင် အသင်း လူစာရင်းတွင်လည်း ရတနာပုံ အသင်းမှ အောင်သူ၊ ရဲကိုဦး၊ သက်နိုင်၊ မျိုးကိုထွန်း၊ လှိုင်းဘိုဘို၊ ရဲဝင်းအောင် အစရှိသည့် ကစားသမား ခြောက်ဦး အထိ ပါဝင်ခဲ့သည်။

မဇ္ဈိမသတင်း by mizzima

Originally published at - http://mizzimaburmese.com/article/10969