မြူးနစ်၊ နိုဝင်ဘာ ၅ ။။
ချန်ပီယံလိဂ်အုပ်စုပွဲစဉ် (၄)တွင် ဘိုင်ယန်မြူးနစ်အသင်းကို ၅-၁ ဂိုးဖြင့် ဂိုးပြတ်ရှုံးနိမ့်ခဲ့ရပြီးနောက် အာဆင်နယ်အသင်းနည်းပြ အာစင်ဝင်းဂါးက ၎င်းတို့အသင်းအနေဖြင့် ရှုံးထွက်အဆင့်သို့ တက်ရောက်နိုင်သေးကြောင်း ပြောဆိုလိုက်သည်။
ပွဲစဉ်လေးပွဲကစားပြီးချိန်တွင် ဘိုင်ယန်မြူးနစ်အသင်းနှင့် အိုလံပီယာကော့စ်အသင်းတို့မှာ သုံးပွဲစီနိုင်ထားပြီး ရမှတ်ကိုးမှတ်ရရှိထားကာ ဒိုင်နမိုဇာဂရက်နှင့် အာဆင်နယ်တို့က သုံးမှတ်စီ ရရှိထားကြသည်။
အာဆင်နယ်အသင်းသည် လက်ကျန်ပွဲစဉ်နှစ်ပွဲအဖြစ် အိုလံပီယာကော့စ်၊ ဒိုင်နမိုဇာဂရက်တို့နှင့် ကျန်ရှိနေပြီး နှစ်ပွဲစလုံးအနိုင်ရရှိရန် လိုအပ်နေသည်။
ထို့အပြင် အိုလံပီယာကော့စ်မှာ နှစ်ပွဲစလုံးရှုံးရန်လိုအပ်ပြီး အာဆင်နယ်က အိုလံပီယာကော့စ်နှင့်ပွဲတွင် ဂိုးပြတ်အနိုင်ရရန် လိုအပ်လျက်ရှိသည်။
အာစင်ဝင်းဂါးက 'နောက်တစ်ဆင့်တက်ဖို့ ကျွန်တော်တို့မှာ အခွင့်အရေးရှိပါသေးတယ်။ အိုလံပီယာကော့စ်အသင်းသာ ဒီကွင်းမှာ ရှုံးခဲ့မယ်ဆိုရင် အလွန်သေးငယ်တဲ့ အခွင့်အရေးတစ်ခု ရှိနေပါသေးတယ်။ ရှုံးထွက်အဆင့်ကိုတက်နိုင်ဖို့ အစွမ်းကုန်ကြိုးစားသွားမှာပါ။ ဒီနေ့ကစားပုံအတိုင်းသာ ကစားမယ်ဆိုရင် ဘိုင်ယန်က အိုလံပီယာကော့စ်ကိုနိုင်မှာသေချာပါတယ်' ဟု ပြောသည်။
ထို့အပြင် အာစင်ဝင်းဂါးက ဘိုင်ယန်နှင့်ပွဲမှ အသင်း၏ ခံစစ်ကစားပုံမှာ အလွန်ဆိုးရွားကြောင်း ဝေဖန်ခဲ့ပြီး လာမည့် ပရီးမီးယားလိဂ်ပွဲစဉ်အတွက် ပြန်လည်ပြင်ဆင်သွားမည်ဖြစ်ကြောင်း ပြောဆိုခဲ့သည်။
ရည်ညွှန်း မယ်ရာ
မဇ္ဈိမ မာလ်တီမီဒီယာ by mizzima
Original link - http://mizzimaburmese.com/article/6996
| ဒီပို့စ်လေးကို နှစ်သက်တယ်ဆိုရင် | လုပ်နိုင်ပါတယ်။ |
No comments:
Post a Comment